Mikilvæg skref hafa verið tekin í átt að uppbyggingu nýs golfvallar í Hafnarfirði eftir að núverandi bæjarstjórn samþykkti nýtt aðalskipulag fyrir árin 2025–2040. Þar er gert ráð fyrir allt að 260 hektara svæði fyrir nýjan 36 holu golfvöll í samstarfi Golfklúbbsins Keilis og Golfklúbbs Setbergs.
Svæðið er staðsett í upplandi Hafnarfjarðar, á svæðum sem nefnast Snókalönd og Óbrinnishólar og er hugsað sem framtíðarheimili golfíþróttarinnar í bænum. Auk vallarins er gert ráð fyrir æfingasvæði, tengdum mannvirkjum og aðstöðu sem getur einnig nýst fyrir aðra útivist svo sem göngur og hjólreiðar.
Á síðustu árum hefur golfíþróttin vaxið hratt á höfuðborgarsvæðinu og biðlistar í klúbba orðnir langir. Í dag eru um 2.200 félagar í Keili og yfir 500 á biðlista á meðan Setberg telur nær 950 félaga og um 300 á biðlista.
Nýr golfvöllur er því ekki aðeins stórt íþróttaverkefni heldur einnig mikilvægt skref til að mæta aukinni eftirspurn og bæta aðgengi almennings að íþróttinni.
Undirbúningur verkefnisins hefur staðið yfir um nokkurt skeið þar sem starfshópur á vegum bæjarins skoðaði mismunandi staðsetningar áður en niðurstaða fékkst um besta kostinn. Nú hefur verið skipaður framkvæmdahópur sem mun vinna að næstu skrefum í uppbyggingunni.
Áhersla er lögð á að sameina krafta Keilis og Setbergs, nýta þekkingu og mannauð beggja klúbba og byggja upp aðstöðu sem standast kröfur nútímans.
Golfíþróttin hefur í auknum mæli verið tengd við bætt lífsgæði og lýðheilsu. Með nýjum velli skapast tækifæri fyrir fleiri að stunda golf og njóta útivistar í fjölbreyttu umhverfi.
Gæti þetta orðið eitt stærsta golfverkefni landsins á næstu árum og markað nýjan kafla í þróun golfs í Hafnarfirði.
Nánar má lesa um verkefnið hér í grein eftir Örn Geirsson sem birtist 30. apríl 2026.
