Tæknin er farin að hafa áhrif á golfið á ýmsa vegu, en fáir fara jafn ótroðnar slóðir og Bryson DeChambeau. Bandaríkjamaðurinn vakti athygli um helgina þegar hann upplýsti að hann hefði leitað aðstoðar hjá gervigreindinni Google Gemini til að leysa vandamál í golfsveiflunni sinni.
Niðurstaðan lét ekki á sér standa.
Eftir erfiðan laugardag á LIV Golf Korea lék DeChambeau lokahringinn á sjö höggum undir pari, 65 höggum, og endaði í þriðja sæti, aðeins einu höggi frá bráðabana um sigurinn.
DeChambeau hefur ekki verið sáttur við leik sinn undanfarna mánuði og viðurkenndi að hann hefði verið orðinn verulega pirraður eftir æfingar á laugardagskvöldi.
Í stað þess að leita til þjálfara eða liðsfélaga settist hann niður með Google Gemini og hóf að ræða eðlisfræði golfsveiflunnar.
„Ég ræddi við gervigreindina um ýmis lögmál eðlisfræðinnar, hvernig kylfan lokast í gegnum höggið og hvaða áhrif gripstyrkur og spenna í höndunum hafa á sveifluna,“ sagði DeChambeau eftir mótið.
Hann sagðist hafa verið að glíma við að fá kylfuhausinn til að snúast eðlilega í gegnum boltann og fundið fyrir því að hendurnar væru of stífar í gegnum höggið.
Eftir samtalið við Gemini komst DeChambeau að þeirri niðurstöðu að vandamálið gæti legið í of miklum gripþrýstingi.
„Ég lærði síðar um kvöldið að ég þurfti einfaldlega að slaka á gripinu og leyfa kylfunni að vinna eðlilega í gegnum höggið,“ sagði hann.
Daginn eftir virtist breytingin hafa skilað árangri þegar hann lék einn besta hring dagsins og blandaði sér aftur í toppbaráttuna.
Þessi nálgun kemur ekki á óvart hjá DeChambeau, sem hefur um árabil verið þekktur fyrir vísindalega nálgun sína á golfið.
Í fyrra gekk hann til samstarfs við Google Cloud til að þróa notkun gervigreindar í æfingum sínum og fjárfesti síðar í fyrirtækinu Sportsbox AI, sem sérhæfir sig í lífhreyfigreiningu fyrir kylfinga.
Þó DeChambeau hafi ekki unnið í Kóreu sýndi hann enn á ný að hann er tilbúinn að prófa nýjar leiðir til að ná forskoti. Nú virðist sem nýjasti „sveifluþjálfarinn“ hans sé hvorki maður né vélmenni á æfingasvæðinu heldur gervigreind sem svarar spurningum á miðri nóttu.
Hvort fleiri atvinnukylfingar fylgi í kjölfarið á eftir að koma í ljós, en eitt er víst, samspil gervigreindar og golfs verður sífellt áhugaverðara á næstu árum.
