Golfið er ein elsta skipulagða íþrótt heims og á sér nær þriggja alda sögu. Í gegnum tíðina hefur leikurinn þróast úr því að vera talinn „heldri manna“ íþrótt yfir í að vera aðgengilegur öllum – ungum sem öldnum, konum og körlum, byrjendum og atvinnumönnum.
Þrátt fyrir þessa þróun standa ákveðin gildi óhögguð. Golfið byggir á heiðarleika, sjálfsaga og gagnkvæmri virðingu. Þar sem enginn dómari fylgir leikmönnum um völlinn ber hver og einn ábyrgð á eigin framkomu og virðingu fyrir reglunum.
Hér að neðan eru tíu grundvallar siðareglur sem einkenna góða kylfinga og stuðla að jákvæðri upplifun allra á vellinum.
1. Stundvísi og undirbúningur
Mætið tímanlega á teig, helst 10–15 mínútum fyrir áætlaðan rástíma. Það sýnir virðingu fyrir meðspilurum og tryggir að leikurinn hefjist á réttum tíma. Góður undirbúningur og stutt upphitun bæta einnig frammistöðu.
2. Eðlilegur leikhraði
Viðhaldið eðlilegum leikhraða og fylgið hollinu á undan. Ef þið dragist aftur úr og hollið á eftir þarf að bíða skal hleypa því fram úr. Hægur leikur hefur áhrif á upplifun allra kylfinga.
3. Umhirða vallarins
Lagið torfur, lagið boltamerki á flöt og sléttið glompur eftir notkun. Völlurinn er sameiginleg auðlind og ber okkur að skilja hann eftir í góðu ástandi.
4. Leitin að bolta
Leitið að týndum bolta í hæfilegan tíma, að hámarki þrjár mínútur. Ef vafi leikur á skal slá varabolta. Það sparar tíma og viðheldur flæði leiksins.
5. Ró og einbeiting
Slökkvið á hringingu síma og forðist óþarfa hávaða. Golf krefst einbeitingar og rólegrar umgengni á vellinum.
6. Stjórn á tilfinningum
Golf reynir á þolinmæði. Óviðeigandi framkoma, blót eða kylfuköst eiga ekki heima á golfvelli. Sýnið sjálfsaga og virðingu fyrir meðspilurum.
7. Forðist truflun
Standið kyrr og utan sjónlínu þegar aðrir slá. Virðið einbeitingu annarra og forðist hreyfingu eða tal á meðan högg er slegið.
8. Meðferð flaggstöngar og flatar
Ef beðið er um að halda í flaggstöngina skal gera það af natni og leggja hana varlega fyrir utan flötina. Aldrei fara með golfpoka eða kerru inn á flötina – flötin er viðkvæmasti hluti vallarins.
9. Snyrtimennska og klæðaburður
Golfið á sér hefðir og ákveðinn virðuleika. Klæðaburður skal vera snyrtilegur og viðeigandi. Áfengisneysla á heima eftir leik, ekki á meðan á hring stendur.
10. Virðing fyrir leiknum
Heiðarleiki er hornsteinn golfíþróttarinnar. Skráið rétt skor, fylgið reglum og sýnið sanngirni. Golfið snýst ekki aðeins um árangur heldur einnig um framkomu og gildi.
