Tómas Eiríksson Hjaltested, GR og Heiðrún Anna Hlynsdóttir, GOS eru stigameistarar 2025 á GSÍ mótaröðinni.
Þetta er í fyrsta skiptið sem þau hreppa stigameistaratitilinn, en þau léku bæði frábærlega á tímabilinu.
Heiðrún Anna lék í fimm mótum í sumar og endaði með 4.300 stig, rúmum 2400 stigum á undan öðru sætinu. Hún lék ekki í Vormóti GM, sem var fyrsta mót ársins. Eftir það vann Heiðrún næstu fjögur mót mótaraðarinnar, og hafði tryggt sér stigameistaratitilinn áður en Íslandsmótið hófst. Hún fór svo gott sem fullkomlega í gegnum mótin, og var oftar en ekki í efsta sæti frá upphafi móts.
Í aðdraganda Íslandsmótsins ristarbrotnaði Heiðrún, líkt og kom fram í Íslandsmótsblaðinu. Hún lék þó í mótinu og hafnaði þar í fimmta sæti, sem verður að teljast góður árangur miðað við aðstæður.
Tómas lék í öllum sex mótum mótaraðarinnar og endaði með 2.595 stig. Einstakur stöðugleiki og góð spilamennska einkenndi sumar Tómasar, sem hafði verið í efstu fimm sætunum í öllum mótum fram að Íslandsmóti. Hann hafnaði í þrisvar í öðru sæti, í Vormóti GM, Vormóti GÞ og í Korpubikarnum. Hann varð þriðji í Íslandsmótinu í holukeppni og fimmti í Hvaleyrarbikarnum. Tómas endaði í 22. sæti Íslandsmótsins í golfi, en hafði svo gott sem tryggt sér titilinn fyrir mót.
Hér má sjá nokkrar myndir af Tómasi og Heiðrúnu í sumar.
